एमाले मनहरीको अध्यक्षमा वीर बहादुर मिजारको दाबी

मनहरी । नेकपा एमाले मनहरी गाउँपालिका कमिटीको आगामी मङ्सिर २६ गते हुने तेस्रो अधिवेशनमा वीर बहादुर मिजारले अध्यक्ष पदमा उम्मेदवारी घोषणा गरेका छन् ।

लामो समयदेखि पार्टी संगठनमा सक्रिय रहँदै आएका मिजारले राजनीतिक तथा सामाजिक दुवै क्षेत्रमा हासिल गरेको अनुभवलाई आधार बनाउँदै गाउँपालिका कमिटीको नेतृत्वमा आफ्नो दाबी प्रस्तुत गरेका हुन् ।

पार्टी संगठनभित्र विभिन्न तह र जिम्मेवारीमा रहेर काम गरिसकेका मिजारको राजनीतिक यात्रा संगठनात्मक गतिविधि, निर्वाचन परिचालन र पार्टीका वैचारिक अभियानसँग जोडिएको छ । उनले २०७० सालको संविधानसभा निर्वाचनदेखि २०७४ सालको स्थानीय तह, प्रदेश तथा संघीय निर्वाचनसम्म पार्टीको जिम्मेवार कार्यकर्ताका रूपमा भूमिका निर्वाह गरेका थिए । २०७८ सालमा पार्टी विभाजनको कठिन परिस्थितिमा समेत आफू पार्टीको विचार, सिद्धान्त र आस्थामा अडिग रहेको उनको भनाइ छ । त्यसैगरी २०७९ सालका निर्वाचन तथा २०८२ सालको संघीय निर्वाचनका क्रममा पनि संगठनले दिएको जिम्मेवारी पूरा गरेको उनले बताएका छन् ।

राष्ट्रिय युवा संघ नेपाल मनहरी गाउँ कमिटीको सचिव, बागमती प्रदेश सदस्यका रूपमा एक कार्यकाल, नेकपा एमाले मनहरी गाउँ कमिटी सदस्यका रूपमा दुई कार्यकाल, प्रदेश क्षेत्रीय कमिटी सदस्य तथा राष्ट्रिय युवा संघ नेपाल बागमती प्रदेश उप-सचिवको जिम्मेवारी सम्हालिसकेका मिजारले विभिन्न पालिकाको इन्चार्जका रूपमा समेत काम गरिसकेका छन् । प्रदेश सदस्यका रूपमा रहँदा आफूलाई दिइएको जिम्मेवारी प्रभावकारी रूपमा सम्पन्न गरेको उनको अनुभव छ ।

राजनीतिसँगै सामाजिक तथा सामुदायिक नेतृत्वमा पनि अनुभव

मिजारको अनुभव पार्टी संगठनमा मात्र सीमित छैन । उनले श्री चुरियामाई मध्यवर्ती सामुदायिक वन उपभोक्ता समितिको अध्यक्ष, सूर्य किरण युवा क्लबको अध्यक्ष तथा मिजार समाज नेपाल, मकवानपुरको जिल्ला सचिवलगायत विभिन्न सामाजिक तथा संघसंस्थामा रहेर जिम्मेवारी निर्वाह गरिसकेका छन् ।

सामुदायिक वन व्यवस्थापन, युवा परिचालन, सामाजिक एकता तथा समुदायसँग प्रत्यक्ष जोडिएका विभिन्न गतिविधिमा नेतृत्वदायी भूमिका निर्वाह गरेको अनुभवलाई उनले आफ्नो नेतृत्व यात्राको महत्त्वपूर्ण आधारका रूपमा लिएका छन् । राजनीतिक संगठन र सामाजिक संस्थामा काम गर्दा प्राप्त गरेको अनुभवलाई पार्टीको गाउँपालिका कमिटीको नेतृत्वमा उपयोग गर्ने उनको सोच रहेको छ ।

अग्रजको अनुभव र नयाँ पुस्ताको ऊर्जालाई जोड्ने प्रतिबद्धता

जेन्जी पुस्ताका युवा मिजारले पार्टीको वैचारिक निष्ठा, संगठनात्मक अनुभव र नयाँ पुस्ताको नेतृत्व सहभागितालाई प्राथमिकतामा राखेका छन् । अग्रज पुस्ताको अनुभव र युवा पुस्ताको ऊर्जा संयोजन गर्दै संगठनलाई थप गतिशील, एकताबद्ध, पारदर्शी र कार्यकर्तामैत्री बनाउने आफ्नो योजना रहेको उनले बताएका छन् ।

उनका अनुसार नेतृत्व भनेको पद प्राप्ति मात्र नभई संगठनप्रतिको जिम्मेवारी, कार्यकर्ताको सम्मान, सामूहिक निर्णयको कार्यान्वयन र पार्टीको नीति तथा सिद्धान्तप्रतिको प्रतिबद्धता हो । मार्क्सवाद–लेनिनवादको अध्ययन र जनताको बहुदलीय जनवादप्रतिको विश्वासलाई आफ्नो राजनीतिक आधार मान्ने मिजारले पार्टीको विधि, पद्धति र सिद्धान्तअनुसार संगठन सञ्चालन गर्ने प्रतिबद्धता व्यक्त गरेका छन् ।

मनहरी गाउँपालिकाका १ देखि ९ वटै वडामा रहेका नेता, कार्यकर्ता तथा अधिवेशन प्रतिनिधिहरूको साथ, सहयोग र विश्वासको अपेक्षा गर्दै उनले अध्यक्ष पदमा आफ्नो दाबी प्रस्तुत गरेका हुन् ।

राजनीतिक संगठनदेखि सामुदायिक तथा सामाजिक संस्थासम्म विभिन्न जिम्मेवारी सम्हालिसकेका मिजारले आफूले प्राप्त गरेको अनुभव, सिकाइ र कार्यकर्तासँगको सम्बन्धलाई संगठनको हितमा प्रयोग गर्ने बताएका छन् ।

विचारमा निष्ठा, व्यवहारमा इमानदारी र जिम्मेवारीमा प्रतिबद्धता भन्ने मान्यतासहित अध्यक्ष पदमा अघि बढेका मिजारको उम्मेदवारीलाई मनहरी एमालेको तेस्रो अधिवेशनमा युवा नेतृत्व र संगठनात्मक अनुभवसँग जोडिएको दाबीका रूपमा हेरिएको छ ।