हेटौँडा । हेटौँडाका अभियन्ता बिशाल राज महतले स्थानीय सरकारले प्रचलित औषधि ऐन, नियम र आवश्यक अनुमति पूरा गरी आफ्नै स्वामित्वमा सुपथ मूल्य औषधि पसल सञ्चालन गर्नु पर्ने बताएका छन् ।
उनले नागरिकलाई जुनसुकै समयमा औषधि आवश्यक पर्न सक्ने भएकाले दक्ष जनशक्तिको व्यवस्था गरी २४ सै घण्टा सेवा दिने अवधारणा अघि बढाउन आवश्यक भएको बताएका हुन् ।
सामाजिक सञ्जालमा लेख्दै महतले विशेषगरी रातिको समयमा आकस्मिक रूपमा औषधि आवश्यक पर्दा पसल नपाउने र महँगो मूल्य तिर्नुपर्ने समस्यालाई यसले राहत पुग्ने बताए । उनले भनेका छन्, ‘मधुमेह, उच्च रक्तचाप, मुटु, दमलगायत दीर्घरोगका नियमित औषधि सुलभ मूल्यमा उपलब्ध गराउने र विपन्न नागरिकलाई विशेष सहुलियत वा निःशुल्क औषधिको व्यवस्था गर्नुपर्छ।’
उनले स्थानीय सरकारले ठूला योजना र देखावटी विकासभन्दा जनताको दैनिक जीवनसँग प्रत्यक्ष जोडिएका विषयमा प्राथमिकतामा पार्नु पर्ने बताउँदै जनताबाट उठेको कर जनताकै जीवन सहज बनाउन खर्च गर्न आग्रह गरेका छन् ।
Leave a Comment